Deu 10 | ZomZIV | STEP | Tua hun laitakin TOPA in kei kiangah, “A masa pen tawh a kibang suangpek nih khuakkhia inla mualtung ka kiangah hong pai to in. Singkuang to khat zong lem in.

Deuteronomy 10

A Masa Pen Bang Suangpek

1 Tua hun laitakin TOPA in kei kiangah, “A masa pen tawh a kibang suangpek nih khuakkhia inla mualtung ka kiangah hong pai to in. Singkuang to ^{▼▼10.1 Tua pen thukhun singkuang} khat zong lem in. 2 Keimah in suangpekte tungah, na suktapsa a masa pen suangpekte tunga thute mah ka gelh ding hi. Tua ciangin singkuang sungah koih in,” hong ci hi.

3 Tua ciangin singkha singkuang khat ka bawla, a masa pen tawh a kibang suangpek nih khuakkhia in suangpek nihte tawisa in mual tungah ka paito hi. 4 TOPA in ama-a, a gelhsa mualtunga mipite na kikhop ni-ua meikuang lakah no tunga a tangkosa Thupiak Sawmte mah hih suangpekte tungah a gelh hi. TOPA in tuate kei hong pia hi. 5 Tua ciangin mualtung pan kong ciahsuk-a, TOPA hong thupiaksa bangin ka bawlsa singkuang sungah suangpekte ka koih hi; tu-in tuate tuaci om lai hi. ^b

6 (Jaakan-te tuikhukte panin Moserah ah Israel-te a zin uh hi. Tua lai-ah Aaron si-a kivui-in a tapa Eleazar in a siampi za a luah hi. 7 Tua lai panin Gudgodah ah zin uh a, luitui omna gam Jotbathah dong a zinsuak uh hi. 8 Tua hun laitakin TOPA in, Levi behte in tuni donga a sep uh bangin TOPA thukhun singkuang pua ding, TOPA mai-ah dingin biakna nasem ding le ama mina thupha a pia dingin amaute a sehtuam hi. 9 Tua hangin Levi-te in amau sanggamte lakah tanh ahi-a luah ahi zongin nei lo uh a; TOPA note Pasian hong gensa bangin amaute’ luah in TOPA ahi hi.)

10 Tu-in a masa a ka hih bangin, mualtungah sun sawmli le zan sawmli ka om khin a, hih hunin zong TOPA in ka thu hong ngai hi. Note suksiat ding ama deihna hi lo hi. 11 TOPA in kei kiangah, “Pai inla a maute piak dinga a pate uh tunga ka khapsa gamah luta a lak nadingun lampi ah amaute makaih in,” hong ci hi. ^c

TOPA Kihta Un

12 Israel aw, tu-in ahileh TOPA note Pasian in note tungah bangdang hong ngen loin: TOPA note Pasian kihta a, ama lampite zui-in amah it a, na lungsim khempeuh uh le na hinna khempeuh uh tawh TOPA note Pasian na sem-a, 13 note hoih nadingin tuni-a note kong piak TOPA thupiakte le thukipte na zuih ding bek uh hi lo ahi hiam?

14 Vante le a sang pen vante nangawn, leitung le a sunga omte khempeuh TOPA note Pasian aa ahi hi. 15 Tua hi napi TOPA in na pute uh aituam bawlin amaute it a, tuni-a na om bangun minamte khempeuh tung pekah amau suan note hong teel hi. 16 Tua ahi ciangin na lungsim uh vun-at unla na ngawng uh khauhsak nawn kei un. 17 Ahang in, TOPA note Pasian ahileh pasiante’ Pasian, topate’ Topa, thahatin a kihtakhuai, kuamah deidan a nei lo, golhsum a sang lo a lian mahmah Pasian ahi hi. 18 Amah in pa neilote le meigongte panpihin, pemtate it a, an pia in puansilh a guan hi. 19 Tua hi a note zong Egypt a pemta hi ngei na hi manun pemtate na it ding uh hi. 20 TOPA note Pasian kihta unla a na sem un. Amah kiplet unla ama minin kiciam un. 21 Amah pen note’ phat, na mit uh tawh na muh uh a lian a kihtakhuai a lamdang nate a bawl, note Pasian ahi hi. 22 Egypt a, paisuk na pute uh a vekin sawm sagih pha hi, tua hi-a tu-in TOPA note Pasian in vana aksi zahin hong tamsak khin hi.